ta’arruf
urdu zabaan se mohabbat karne vaaloN ko khush aamdeed!
she’r-o-sukhan ki deegar mehfiloN ki tarah yeh mehfil bhi urdu zabaan ki zulf-e-pechaaN ko saNvaarne meiN hama-tan masroof hai. ya yuN keh lijiye ke yeh eik markaz hai jahaaN duniya ke mukhtalif goshoN se ta’alluq rakhne vaale afraad jama’ hote haiN.
 in meiN bohat se mashshaaq sho’ra bhi haiN jo apne kalaam se bazm ko jagmagaate haiN aur in meiN no-vaaridaan-e-sukhan bhi haiN jo in mashshaaq sho’ra se rehnumaaii haasil karte haiN aur taraqqi ke madaarij tai karte haiN.
chuN-k yeh mehfil saraapa adab hai is liye yahaaN she’r-o-adab ke saath saath nasri mazaameen aur maqaale bhi pesh kiye jaate haiN, deen-o-mazhab, aqaaid, siyaasat aur halaat-e-haazira par bhi guftagu hoti hai aur saath hi tanz-o-mazaah ke shagufe khilaaye jaane ke saath mukhtalif qism ke dilchasp khel bhi pesh kiye jaate haiN.
hamaara maqsad aur hamaari khvaahish urdu zabaan ka farogh hai. aaiye aur is safar meiN hamaare ham~safar ban jaaiye. yaqeenan ham sab ki urdu zabaan se mohabbat isay taraqqi ki naii manziloN ki taraf le jaaye gi. insha Allah!
