Author Topic: raat, jee khol ke phir, maiN ne du'aa maaNgii hai!  (Read 510 times)

0 Members and 2 Guests are viewing this topic.

Offline B.G.M.

  • hamsafar
  • **
  • Posts: 81
  • Karma: +0/-0
  • Gender: Male
raat, jee khol ke phir, maiN ne du'aa maaNgii hai!
« on: May 21, 2016, 12:07:20 PM »



raat,  jee khol ke phir,  maiN  ne du'a maaNgii hai
aur ik cheez baRi besh-bahaa maaNgii hai

aur woh cheez nah daulat, nah makaaN hai, nah maHal
taaj maaNgaa hai, nah dastaar-o-qabaa maaNgii hai

nah to qadmoN ke talay farsh-e-guhar maaNgaa hai
aur nah sar par kulah-e-baal-e-humaa maaNgii hai

 nah shareek-e-safar-o-zaad safar maaNgaa hai
nah sadaa-e-jaras-o-baaNg-e-daraa maaNgii hai

nah Sikandar ki taraH  fat'H  kaa parcham maaNgaa
aur nah maanind-e-Khizar  'Umr-e-baqaa maaNgii hai

nah ko'ii 'ohdah, nah kursii, nah laqab maaNgaa hai
nah kisii Khidmat-e-qaumii ki jazaa maaNgii hai

nah to mehmaan-e-Khususii kaa sharaf maaNgaa hai
aur nah meHfil meN kahiiN Sadr ki jaa maaNgii hai

mai-kadah maaNgaa, nah saaqii, nah gulistaaN, nah bahaar
jaam-o-saaGhar , nah mai-e-hoshrubaa maaNgii  hai

nah to manzar ko'ii shaadaab-o-HasiiN maaNgaa hai
nah SeHat baKhsh ko'ii   aab-o-hawaa maaNgii hai

meHfil-e-'Aish, nah saamaan-e-tarab maNgaa hai
chaaNdani raat, nah ghanghor ghaTaa maaNgi hai

baaNsuri maaNgi, nah  taa'Uus, nah barbat, nah rubaab
nah ko'ii mutrib-e-shireeN ki navaa maangii hai

chain ki neeNd, nah aaraam kaa pehluu maaNgaa
baKht-e-bedaar, nah taqdeer-e-rasaa maaNgii hai

 nah to ashkoN ki faraavaani se maaNgii hai nijaat
aur nah apne maraz-e-dil ki dawaa maaNgii hai

nah Ghazal ke liye aahaNg nayaa maaNgaa hai
nah tarannum ki nayii tarz-e-adaa maaNgii hai

sun ke Hairaan hu'e jaate haiN arbaab-e-chaman
aaKhirash! kaun si, paagal ne, du'aa maaNgii hai?

Aa! tire kaan meN keh duuN!  ai naseem-e-seHri,
Sab se pyaari mujhe kyaa cheez hai? kyaa maaNgii hai

woh saraapaa-e-sitam,  jis kaa maiN  deevaanah huuN
us ki zulfoN ke liye  buu-e-wafaa  maaNgii hai!!


~ Late Dr. Kaleem 'Aajiz

============================================

Offline muhammadahmed

  • Global Moderator
  • *****
  • Posts: 160
  • Karma: +0/-0
  • Gender: Male
    • رعنائیِ خیال
Re: raat, jee khol ke phir, maiN ne du'aa maaNgii hai!
« Reply #1 on: May 31, 2016, 05:43:13 AM »
bohat kalam hay janab!

shamil e mehfil karnay ka bohat shukhria!
Muhammad Ahmed