haath mera aie miri parchhaaii

tanhaa — Mon, 28 Aug 2006 13:19:55 +0000

janaab Zuhoor Nazar ki ek bahut hi shaandaar ghazal haazir hai:

haath meraa aie mirii parchhaaii tuu hii thaam le
ek muddat se mujhe to soojhtaa kuchh bhii nahiiN

shahr-e-shab meiN kaun sa ghar tha, na dii jis par sadaa
neeNd ke aNdhe musaafir ko milaa kuchh bhii nahiiN

umr bhar umr-e-gurezaaN se na merii ban sakii
jo kare, kartii rahe, maiN poochhtaa kuchh bhii nahiiN

vo bhii shaayad ro paRe veeraan kaaGhaz dekh kar
maiN ne usko aaKhiri Khat meiN likhaa kuchh bhii nahiiN

mire va’adoN ko gin_naa chhoR do tum

stanvir — Wed, 23 Aug 2006 01:51:00 +0000

mire va’adoN ko gin_naa chhoR do tum
muhabbat ko parakhnaa chhoR do tumÃ‚Â

Q
ye daava-e-vafaa kis kaam ka hai?
miri jaaN! aise ban_naa chhoR do tum

aur us par poochhti ho “kyaa hua hai?”Ã‚Â
aray! ghairoN se milnaa chhoR do tum
–

vahaaN par dostii hai naam hii kii
vahaaN kaa aanaa-jaanaa chhoR do tum

bichhaRne ki jo dil meiN Thaan lii hai
bahaane par bahaanaaa, chhoR do tum

hamaaraa rishta ik ummeed par thaa
magar ab vo fasaanaa chhoR do tum

tumheiN ma’aloom hai anjaam-e-ulfat
vafaa ke geet gaanaa chhoR do tum!

agar qismat meiN fitne hi likhe haiN
to har aafat pe ronaa chhoR do tum

ye zauq-e-shaayari to Theek hai par
ghazal ko nazm kahnaa chhoR do tum

Khudaa kaa Khauf mujhko bhi hai yaaro!
mujhe kaafir bulaanaa chhoR do tum

sanamkhaanoN meiN ‘tanhaa’ kuchh nahiiN hai
vahaaN par sar jhukaanaa chhoR do tum