dil khoon rulaaye ga

dil-khoon-rulaaye-ga

dil khoon rulaaye ga jigar tang karay ga
mujh ko teri chaahat ka safar tang karay ga

is raah-e-mohabbat meiN qadam soch kay rakhna
ik bojh sa ban jaaye ga sar tang karay ga

is darja zamaana tera ho jaaye ga dushman
saaye meiN jo baiThay ga, shajar taNg karay ga

dil chen na paaye ga kaheeN tujh say bichhaR kay
maiN laakh saNbhalooN ga magar tang karay ga

is ghar ki har ik cheez sataaye gi tiray ba’ad
dehleez pe baThooN ga to dar taNg karay ga

maana kay abhi aur sataaye ga yeh rasta
maiN lauT kay jaaooN ga to ghar tang karay ga

mahboob ki chaukhaT say uTha laya hooN dil ko
ab lay k isay jaaooN kidhar, tang karay ga

ai dil maiN teray naaz uThaaooN to kahaaN tak?
ab maar hi DalooN ga agar tang karay ga!!!

haaN aur Shoaib aap ko rona hi paRay ga
haaN aur abhi deeda-e-tar taNg karay ga