bohat bojhal tabiat ho rahi hai

galay mil kar voh mujh say ro rahi hai
miray seenay meiN kaaNTay bo rahi hai

bala say ab voh be~gaana hai phir bhi
kabhi ham meiN mohabbat to rahi hai

utarti jaa rahi hai meray dil say
mujhay voh rafta rafta kho rahi hai

isay phir kis liye bhaRka rahay ho?
zara si aag baaqi jo rahi hai

khuda kay vaastay aahista bolo
yahaaN taqdeer meri so rahi hai

bohat naadim hooN maiN is zindagi se
abhi tak bojh mera Dho rahi hai

Shoaib aao kaheeN baahar chaleN ham
bohat bojhal tabiat ho rahi hai

Shoaib Tanvir Shoaib