Monthly Archives: June 2009

raat eik mehfil meiN

raat eik mehfil meiN

Ghazal: bohat chup ho shikaayat chhoR di kya?

bohat chup ho shikaayat chhoR di kya?

Liaquat Ali Asim sahib ki eik khoobsoorat ghazal:

bohat chup ho shikaayat chhoR di kya?
rah-o-rasm-e-mohabbat chhoR di kya?

yeh kya andar hi andar bujh rahay ho
havaaoN se raqaabat chhoR di kya?

manaatay phir rahay ho har kisi ko
khafa rehnay ki aadat chhoR di kya?

liyay baiThi haiN aaNkheN aansuooN ko
sitaaaroN ki sayaahat chhoR di kiya?

ghubaar-e-shaihr ki kiyuN baiTha hua hai
mire aahu nay vehshat chhoR di kya?

faqeeroN ki taraf aanay lagay phir
numaaish-gaah-e-shohrat chhooR di kya?

mire kamray ko ma’bad kehnay vaali
kahaaN hai tu ibaadat chhoR di kya?

yeh duniya to naheeN maanay gi Asim
magar tum ne bhi hujjat chhoR di kya?