« Terrorism | Home | Khvaab kii tarah bikhar jaane ko jii chaahataa hai »
khooN baha
By stanvir | November 22, 2007
khooN baha
(Iftikhar Arif)
apne shaih~savaaroN ko
qatl karne vaaloN se
khooN baha talab karna
vaarisoN pe vaajib tha,
qaatiloN pe vaajib tha
khooN baha ada karna
vaajibaat ki takmeel
munsifoN pe vaajib thi
(musnifoN ki nigraani
qudsioN pe vaajb thi)
vaqt ki adaalat meiN
eik samt masnad thi
ek samt khanjar tha
taaj-e-zar-nigaar ik samt
eik samt lashkar tha
ik taraf thi majboori
ik taraf muqaddar tha
taaife pukaar uTThe
“taaj-o-takht zindabaad!
saaz-o-rakht zindabaad!”
khalq ham se kehti hai, saara maajra likkheN
kis ne kis tarah paaya apna khooN baha, likkheN
chashm-e-nam se sharminda,
ham qalam se sharminda, sochte haiN kiya likkheN
Topics: Iftikhar Arif, Nazm, Shaa'iri, Urdu |
Comments
You must be logged in to post a comment.
