kya hai khaana-kharaab meiN rakkha?

By Fatima | May 31, 2007

zindagi ke nisaab meiN rakkha
gham ko khushioN ke baab meiN rakkha

daagh jesa ata kya mujh ko
vesa hi maahtaab meiN rakkha

mere seene meiN dil diya aise
jese kaaNTa gulaab meiN rakkha

mujh ko duniya meiN kar diya rusva
aur khud ko naqaab meiN rakkha

mujh se va’ada visaal ka kar ke
umr bhar iztaraab meiN rakkha

phool bheja usay lifaafe meiN
us ne kaaNTa javaab meiN rakkha

naam sun kar Shoaib ka bole
kya hai khaana-kharaab meiN rakkha?

Topics: Ghazal, Shaa'iri, Shoaib Tanvir Shoaib, Urdu |

Comments

You must be logged in to post a comment.