« hoNToN se voh lafz kaho jo kaajal kehta hai | Home | Technicalities of Ghazal »
raat eik mehfil meiN, guftgoo namu par thi
By stanvir | May 3, 2007
Azm Behzad sahib ki eik aur la-javaab ghazal:
raat eik mehfil meiN guft_guu namu par thii
har zubaan thii saakit, har nigaah pat’thar thii
ik savaal kii lou se hoNT jhulse jaate the
ik javaab kii ThanDak aah ke baraabar thii
eik be-yageeN lehja khouf se larazta tha
ik Chhupi huii herat, heratoN se baahar thii
voh sukhan zubaN par tha jis ko dil meiN rehna tha
voh shikan jabeeN par thii jo adaaye bistar thii
maiN bohat hirasaaN tha zakhm ke na bharne se
eik shab kii mohlat thii aur jang sar par thii
shaakh-e-dil kii haryaali khvaab ka bayaaN Thehri
maiN ne jis ko nam rak’Kha voh zameeN hii banjar thii
mujh meiN eik darya he jo bipharta rehta he
pehle eik Sehra tha jis pe chup kii chaadar thii
maiN ne us ko har lamha jism se pukaraa tha
ab Khula keh voh khvahish ruuh ke baraabar thii
ishq kii karaamat he varnah umr ke haathoN
khaal-o-khat kii veeraani husn ka muqaddar thii
kya huye voh lab jin se phool hii baraste the
kya huii voh shaadabi jo hameiN moyassar thii
AZM be-sabab dekhha tum ne khvaab-e-sairaabi
dasht ke tasalsul meiN tashnagi hii behtar thii
Topics: Azm Behzad, Shaa'iri, Urdu |
Comments
You must be logged in to post a comment.
